HEMCHEATIMEDAY

Thursday, March 1, 2018

រដ្ឋាភិបាលសម្រេចផ្អាកការដឹកឈើចេញពីតំបន់សង់ទំនប់សេសាន ២

Admin Thursday, March 01, 2018

ទូកច្នៃដឹកឈើដែលអ្នកភូមិថា ដឹកពីខាងក្រៅចូលក្នុងតំបន់ទំនប់សេសានកាលពីខែវិច្ឆិកា។

ភ្នំពេញ/ស្ទឹងត្រែងៈ រដ្ឋាភិបាលបានសម្រេចផ្អាកការដឹកជញ្ជូនឈើនៅតំបន់បាតអាងនៃទំនប់វារីអគ្គិសនីសេសានក្រោម ២ ក្នុងខេត្តស្ទឹងត្រែង និងផ្អាកការឈូសឆាយ នៅដីសម្បទានសេដ្ឋកិច្ច «ជាបន្ទាន់រហូតដល់ការបោះឆ្នោតជាតិ» ក្នុងខែកក្កដាខាងមុខនេះរួច ខណៈដែលអ្នកឃ្លាំមើលបញ្ហាបរិស្ថានចង់ឲ្យបញ្ឈប់សកម្មភាពប្រមូលឈើរបស់ក្រុមហ៊ុនជាស្ថាពរតែម្តង ដោយសារតែអស់ឈើស្របច្បាប់។

ការសម្រេចផ្អាកនេះត្រូវបានធ្វើឡើងតាមរយៈ សជណ របស់ទីស្តីការគណៈរដ្ឋមន្ត្រីកាលពីថ្ងៃទី ២៧ ខែកុម្ភៈដោយឆ្លើយតបទៅនឹងលិខិតស្នើសុំរបស់ក្រសួងបរិស្ថានចុះថ្ងៃទី ២១ ខែកុម្ភៈកន្លងមក។

ក្រោយពីមានចំណាររបស់លោក ហ៊ុន សែន កាលពីថ្ងៃទី ២៣ ខែកុម្ភៈរួចមក លោក ប៊ុន អ៊ុយ រដ្ឋលេខាធិការទីស្តីការគណៈរដ្ឋមន្ត្រី បានចុះហត្ថលេខាដោយឯកភាពទៅតាមសំណើរនោះ។

សជណ បានសរសេរដូច្នេះថា៖ «យល់ព្រមផ្អាកជាបណ្តោះអាសន្ននូវការចេញលិខិតអនុញ្ញាតដឹកជញ្ជូនផល អនុផលព្រៃឈើពីការសម្អាតអាងស្តុកទឹក គម្រោងវារីអគ្គិសនីសេសានក្រោម២ និងការឈូសឆាយសម្អាតទីតាំងគម្រោងវិនិយោគដីសម្បទានសេដ្ឋកិច្ចរហូតដល់ក្រោយការបោះឆ្នោតសកលខាងមុខ។ សូមចាត់វិធានការបន្ទាន់»។

ការសម្រេចនេះត្រូវបានធ្វើឡើងតែមួយថ្ងៃប៉ុណ្ណោះក្រោយពេលដែលការប្រមូលឈើនៅដីសម្បទានសង្គមកិច្ចរបស់ក្រុមហ៊ុន ដួង ស្រួច និងក្រុមហ៊ុនផ្សេងទៀតត្រូវបានរដ្ឋាភិបាលឯកភាពឲ្យបញ្ឈប់តាមសំណើរបស់ក្រសួងបរិស្ថានដូចគ្នានេះ។

បើទោះបីជាការចេញនេះវាហាក់បីដូចជាយឺតពេលបន្តិចក៏ដោយ ក៏លោក ហូ សំអុល អ្នកសម្របសម្រួលអង្គការសិទ្ធិមនុស្សអាដហុកខេត្តស្ទឹងត្រែងបានស្វាគមន៍ ហើយលោកចង់ឲ្យមានការបញ្ឈប់ជារៀងរហូតតែម្តង ដោយមិនចង់ឲ្យមានការអនុញ្ញាតប្រមូលឈើឡើងវិញ ក្រោយពេលបោះឆ្នោតជាតិរួចហើយនោះទេ។ លោកថា ប្រសិនបើគ្មានការផ្អាកនោះទេ ការប្រមូលឈើនឹងនៅតែបន្តក្នុងព្រៃឈើនៅក្នុងស្រុកសៀមប៉ាង និងតំបន់ព្រំប្រទល់រវាងខេត្តស្ទឹងត្រែង និងរតនគិរី។

លោកថ្លែងថា៖ «ជាក់ស្តែងសព្វថ្ងៃហ្នឹងនៅក្នុងបាតអាងអស់ឈើហើយ។ មិនមានឈើឯណាត្រូវបោសសម្អាតទេ ព្រោះអីទឹកចូលពេញផ្ទៃអាង ៣៦០០០ ហិកតាហ្នឹងហើយ។ អ៊ីចឹងការបោសសម្អាតបាតអាងហ្នឹង គឺគ្រាន់តែជាលេសទេ។ ជួនកាលកាប់ជញ្ជូនឈើពីខាងក្រៅយកមកធ្វើជាឈើក្នុងបាតអាងហ្នឹង»។ លោក សំអុល បញ្ជាក់បន្តថា៖ «សម្តេច ហ៊ុន សែន មកសម្ពោធដឹងហើយថា ផ្ទៃអាងត្រូវបានទឹកលិចអស់ហើយ។ ហេតុអីក៏នៅតែឈើបាតអាងៗអីទៀត? វាគ្មានទៅស្ទូចយកឈើពីក្នុងទឹកបានអីទេ។ រយៈពេលជិត ១ ឆ្នាំហើយ ឈើនៅតែដឹកចេញ។ អ៊ីចឹងនៅក្នុងបាតអាងវាអស់ទៅហើយ មានតែឈើក្រៅបាតអាងហ្នឹងឯង»។ លោកបន្ថែមថា ទោះបីជាព្រៃឈើសល់តិចយ៉ាងណាក៏ដោយ ក៏គួរតែព្យាយាមរួមគ្នាការពារបន្តទៅទៀត ដើម្បីទុកឲ្យមនុស្សជំនាន់ក្រោយបានស្គាល់ខ្លះ។

លោក ចាន់ ហេង អ្នកនាំពាក្យក្រសួងកសិកម្មដែលជាស្ថាប័នចេញលិខិតអនុញ្ញាតក្នុងការដឹកជញ្ជូនផលអនុផលព្រៃឈើមិនទាន់បានទទួល សជណ នេះទេ។ លោក ហេង ថ្លែងថា៖ «មិនដឹងយ៉ាងម៉េចដែរ។ ខាងខ្ញុំ អត់ទាន់បានឃើញ [សជណ]។ ប្រហែលជាមានទឡ្ហីករណ៍ច្បាស់លាស់ហើយបានលោក [ក្រសួងបរិស្ថាន] ស្នើទៅសម្តេចអ៊ីចឹង និងបានចេញ សជណ»។ លោក ហេង ថ្លែងថាលោកមិនទាន់អាចធ្វើអត្ថាធិប្បាយយ៉ាងណាលើការផ្អាកនេះទេ ព្រោះជាការងាររបស់ថ្នាក់ដឹកនាំ។

លោក ឆាយ ម៉េង អ្នកទទួលបន្ទុកផ្នែកការងាររដ្ឋបាលក្នុងគម្រោងសាងសង់ទំនប់វារីអគ្គិសនីសេសានក្រោម ២ បានឲ្យដឹងថា ការងារសម្អាតបាតអាងនេះ គឺស្ថិតក្នុងការគ្រប់គ្រងរបស់ក្រុមហ៊ុន Ang & Associates Lawyer Co. Ltd។ ហេតុនេះលោកមិនអាចធ្វើអត្ថាធិប្បាយបាននោះទេ។ តំណាងក្រុមហ៊ុន លោក អ៊ុំ រ៉េត មិនអាចទាក់ទងបានទេកាលពីម្សិលមិញ តែលោកធ្លាប់បានច្រានចោលការចោទប្រកាន់ រឿងកាប់ឈើក្រៅបាតអាងនោះ។ ក្រុមហ៊ុន Ang & Associates Lawyer គឺជាក្រុមហ៊ុនឧបសម្ព័ន្ធនៃក្រុមហ៊ុន Royal Group របស់លោកឧកញ៉ា គិត ម៉េង ។ លោក គិត ម៉េង ថ្លែងថាលោកជាប់រវល់មិនអាចមានប្រសាសន៍បានទេកាលពីម្សិលមិញ។

ក្រុមហ៊ុននេះត្រូវបានលោកនាយករដ្ឋមន្ត្រីចេញលិខិតផ្អាកសកម្មភាពប្រមូលផល អនុផលព្រៃឈើក្នុងតំបន់បាតអាងម្តងរួចមកហើយកាលពីថ្ងៃទី ២ ខែវិច្ឆិកា ឆ្នាំ ២០១៣។ លើសពីនោះលោក ប៊ុន អ៊ុយ កាលពីថ្ងៃទី ១៣ ខែវិច្ឆិកាដដែលនោះក៏បានចេញលិខិតមួយឲ្យក្រសួងកសិកម្មដោយមិនត្រូវឲ្យក្រុមហ៊ុនប្រមូលទិញឈើពីប្រភពខាងក្រៅតំបន់អនុញ្ញាត ដើម្បីធ្វើអាជីវកម្មរបស់ខ្លួនឡើយ ពីព្រោះការប្រមូលទិញបែបនេះនឹងក្លាយជាទីផ្សារមួយដែលលើកទឹកចិត្តឲ្យមានការកាប់ឈើដោយអនាធិបតេយ្យ។

លោករដ្ឋមន្ត្រី សាយ សំអាល់ បានបដិសេធធ្វើអធិប្បាយដោយលោកឲ្យសួរទៅអ្នកនាំពាក្យរបស់ក្រសួង។ អ្នកនាំពាក្យលោក សៅ សុភាព និងលោក អ៊ាង សុផល្លែត មិនអាចទាក់ទងបានទេ។ រីឯលោក ស្រ៊ុន ដារិទ្ធិ នាយកខុទ្ទកាល័យអះអាងថាលោកមិនទាន់បានដឹងពីការស្នើសុំ និងការចេញលិខិតផ្អាកនេះទេ ខណៈដែលលោក ជា សំអាង អគ្គនាយកនៃអគ្គនាយកដ្ឋានរដ្ឋបាលការពារ និងអភិរក្សធម្មជាតិថ្លែងថាលោកជាប់រវល់៕

ត្រួតពិនិត្យអត្ថបទដោយ postkhmer.com

សម្ភាសន៍ ម្ចាស់វណ្ណកម្មកំណាព្យបែបប្រវត្តិសាស្ត្រ «ទំនួញក្រាំងមាសសាវតារខ្មែរ»

Admin Thursday, March 01, 2018

លោក ផេង វិសុដ្ឋារ៉ាមុនី ម្ចាស់វណ្ណកម្មកំណាព្យបែបប្រវត្តិសាស្ត្រ «ទំនួញក្រាំងមាសសាវតារខ្មែរ»

យុវជន ផេង វិសុដ្ឋារ៉ាមុនី មានស្រុកកំណើត នៅភូមិស្វាយជួរ ឃុំកោះខែល ស្រុកស្អាង ខេត្តកណ្តាល និងជាអតីតនិស្សិតបរិញ្ញាបត្រសង្គមវិទ្យានៃពុទ្ធិកសាកលវិទ្យាល័យ ព្រះសីហានុរាជ ។ បច្ចុប្បន្នលោក ជាអ្នកស្រាវជ្រាវឯករាជ្យ អ្នកនិពន្ធ និងអ្នករៀបរៀងចងក្រងឯកសារប្រវត្តិសាស្ត្រមួយចំនួន ។

នៅពេលថ្មីៗ លោកបានបោះពុម្ភផ្សាយកម្រងកំណាព្យប្រវត្តិសាស្ត្រ ដែលមានចំណងជើងថា «ទំនួញក្រាំងមាសសាវតារខ្មែរ» ។ ខ្លឹមសារក្នុងកម្រងអត្ថបទកំណាព្យប្រវត្តិសាស្ត្រ ដែលមាននូវក្នុងសៀវភៅនេះ លោកផ្តោតទៅលើប្រធានបទទាក់ទង កំណាព្យបែបជាតិនិយម និងបែបប្រវត្តិសាស្ត្រ មានជាអាទិ៍ ភូមិសាស្ត្រទូទៅ ឬភូមិសាស្ត្រខេត្តក្រុងរបស់ខ្មែរលើ ខ្មែរក្រោម រួមទាំងខ្មែរកណ្តាល និងផ្តោតទៅលើការតស៊ូររបស់វីរបុរស និងវីរយុទ្ធជនខ្មែរគ្រប់ជំនាន់ ដែលហ៊ានពលីកម្មជីវិតតស៊ូរំដោះជាតិ ដេញបរទេសឈ្លានពានត្រួតត្រាទឹកដី កាលពីអតីត ។ ជាពិសេស វណ្ណកម្មដំបូងរបស់លោក ដែលទើបចេញផ្សាយនេះ លោកបានតាក់តែងនិពន្ធអត្ថបទកំណាព្យជាច្រើនទាក់ទិន និងរឿងកម្ពុជាក្រោម ។ ក្នុងនោះ អត្ថបទកំណាព្យមួយយ៉ាងវែង ដែលលោកបានសរសេររៀបរាប់អំពីទិវាប្រជាជាតិខ្មែរក្រោម កាន់ទុក្ខ ដោយលោកដាក់ចំណងជើងអត្ថបទកំណាព្យនោះថា «៤ មិថុនា មហាទុក្ខនៃប្រជាជាតិខ្មែរ» ជាដើម ។

ផ្តើមចេញពីឆន្ទៈទឹកចិត្ត ដែលតែងតែមានទំនោរនឹកគិត អាឡោះអាល័យសែនស្តាយស្រណោះគ្រប់វិនាទីនៃដង្ហើមចេញចូលប្រចាំថ្ងៃរបស់លោក ។ ផ្គួបផ្សំជាមួយស្មារតីស្រលាញ់ពូជសាសន៍ខ្មែរ និងប្រជាពលរដ្ឋខ្មែររួមទាំងមានឧបនិស្ស័យចូលចិត្ត សិក្សាស្រាវជ្រាវស្វែងយល់ផងនោះ ។ យុវជន ផេង វិសុដ្ឋារ៉ាមុនី ក៏បានស្រាវជ្រាវ និងចងក្រងឯកសារប្រវត្តិសាស្ត្រមួយទៀត ដែលនិយាយពីដែនដីកម្ពុជាក្រោម ឬអតីតកូសាំងស៊ីន រៀបរៀងដោយរូបលោកផ្ទាល់ ។

ក្នុងនាម ជាយុវជនខ្មែរជំនាន់ក្រោយ ហើយលោកក៏ជាកូនអ្នកស្រុកខ្មែរកណ្តាលផងនោះ ។ តើអ្វីជាការជំរុញឲ្យទឹកចិត្តរបស់លោក មិនអាចនៅស្ងៀមបាន រហូតដល់លោក ធ្វើការសិក្សាស្រាវជ្រាវស្វែងយល់ និងចងក្រងកម្រងអត្ថបទកំណាព្យជាតិនិយម និងឯកសារប្រវត្តិសាស្ត្រ ដែលទាក់ទិនទៅ នឹងដែនដីកម្ពុជាក្រោម នេះឡើង? ។ តើយុវជន ផេង វិសុដ្ឋារ៉ាមុនី ជានរណា? លោក ស៊ឺន ចែងចើន នៃទូរទស្សន៍ «ព្រៃនគរ» បានសម្ភាសន៍លោក ផេង វិសុដ្ឋារ៉ាមុនី ជុំវិញរឿងនេះ ។ ត្រួតពិនិត្យអត្ថបទដោយ vokk.net

ជនបរទេសធ្វើការនៅកម្ពុជារងការព្រមានចាត់វិធានការបើមិនអនុវត្តកាតព្វកិច្ច

Admin Thursday, March 01, 2018

សមត្ថកិច្ចក្នុងពេលឃាត់ខ្លួនជនជាតិចិនដែលធ្វើការខុសច្បាប់នៅកម្ពុជា កាលពីឆ្នាំ ២០១៦ ។

ភ្នំពេញៈ ក្រសួងមហាផ្ទៃ និងក្រសួងការងារបានព្រមានថានឹងចាត់វិធានការចំពោះពលករបរទេសប្រមាណជាង ១០ ម៉ឺននាក់ដែលកំពុងធ្វើការនៅកម្ពុជាដោយគ្មានប័ណ្ណការងារ និងមិនព្រមអនុវត្តតាមកាតព្វកិច្ច ដោយពួកគេប្រឈមនឹងការផាកពិន័យ ឬអាចជាប់ទោសមុនឈានដល់ការបណ្ដេញចេញពីកម្ពុជា ខណៈដែលមន្ត្រីសង្គមស៊ីវិលស្នើឲ្យអនុវត្តដោយស្មើភាពស្របពេលសមត្ថកិច្ចខ្លះថា ពួកគេខ្លះមានអ្នកនៅពីក្រោយខ្នង។

នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋាន អន្ដោប្រវេសន៍ និងលោក សេង សក្ដា អគ្គនាយកនៃអគ្គនាយកដ្ឋានការងារក្រសួងការងារ និងបណ្ដុះបណ្ដាលវិជ្ជាជីវៈបានលើកឡើងដូចក្នុងកិច្ចសម្ភាសន៍ជាមួយក្រុមអ្នកសារព័ត៌មានកាលពីម្សិលមិញ បន្ទាប់ពីកិច្ចប្រជុំផ្សព្វផ្សាយប្រកាសអន្ដរក្រសួងស្ដីពីការពង្រឹងការងារអធិការកិច្ចហត្ថពលកម្មបរទេសនៅកម្ពុជា និងសេចក្ដីជូនដំណឹងពីកាតព្វកិច្ចធ្វើប័ណ្ណការងារ និងសៀវភៅការងារជនបរទេស។

លោក សុខ ផល បានបញ្ជាក់ថា បើពលករបរទេសនៅតែបន្ដរឹងរូសមិនព្រមបង់ពិន័យនឹងប្រឈមជាមួយទោសទណ្ឌខាងផ្លូវតុលាការផងដែរ ដោយប្រឈមនឹងការជាប់ពន្ធនាគារ ៣ ខែរួចបណ្ដេញចេញពីកម្ពុជាតែម្ដង ឬម្យ៉ាងទៀតមិនដាក់ពន្ធនាគារទេ តែបណ្ដេញចេញតែម្ដង ដោយផ្អែកតាមច្បាប់អន្ដោប្រវេសន៍។

លោកបានបញ្ជាក់ថា៖ «ពីនេះរហូតទៅដល់ចូលឆ្នាំខែ្មរ ហើយក្រោយចូលឆ្នាំខ្មែរ យើងនឹងត្រួតពិនិត្យឡើងវិញ ហើយផុតសុពលភាពយើងផាកពិន័យ។

ច្បាប់អន្តោប្រវេសន៍បានកំណត់ហើយ បើអត់បង់ប័ណ្ណការងារគឺអាចនឹងត្រូវផ្តន្ទាទោស ៣ ខែតាមរយៈបញ្ជូនទៅតុលាការហើយបណ្តេញចេញ»។

លោកបានបន្តថា៖ «គឺការរំឭកដាស់តឿនចំពោះជនបរទេសដែលបម្រើការងាររកស៊ីនៅស្រុកខ្មែរតាមសហគ្រាសគ្រឹះស្ថានកាស៊ីណូទាំងអស់នេះគឺថាដើម្បីឲ្យបំពេញកាតព្វកិច្ចដោយយើងឃើញថាក្នុងឆ្នាំ ២០១៧ កន្លងទៅនេះគឺគាត់ពុំទាន់បានអនុវត្តកាតព្វកិច្ចឲ្យបានពេញលេញ និងការអនុវត្តច្បាប់របស់ព្រះរាជាណាចក្រកម្ពុជាទេ»។

ដោយឡែកលោក សេង សក្ដា ក៏បានថ្លែងដែរថា រដ្ឋាភិបាលបាននិងកំពុងជំរុញឲ្យពលករបរទេសទាំងអស់ឲ្យធ្វើប័ណ្ណ និងសៀវភៅការងារក្នុងឆ្នាំ ២០១៧ ឲ្យបានរួចរាល់ ហើយបើតាមច្បាប់អន្ដោប្រវេសន៍ និងច្បាប់ស្ដីពីការងារក្នុងឆ្នាំ ២០១៨ នេះគឺតម្រូវឲ្យផាកពិន័យ ប៉ុន្ដែក្រសួងទាំង ២ មិនទាន់បានអនុវត្តនោះទេ គឺទុករយៈពេល ១ ខែ ដើម្បីឲ្យពលករទាំងអស់នោះមកបំពេញកាតព្វកិច្ច។

លោកបានបញ្ជាក់ថា៖ «យើងមិនទាន់ផាកពិន័យទេ គឺយើងទុករយៈពេលមួយខែរហូតដល់ចូលឆ្នាំខ្មែរហើយយើងនឹងត្រួតពិនិត្យឡើង។ ក្នុងច្បាប់អន្តោប្រវេសន៍ និងច្បាប់ការងារគឺយើងមានវិធានរបស់យើង។ នៅពេលគាត់មិនមកធ្វើប័ណ្ណ និងសៀវភៅការងារដែលបំពេញកាតព្វកិច្ចការងារតាមការបង់ពន្ធឲ្យរដ្ឋក្នុង ១ ឆ្នាំតម្លៃ ៤០ ម៉ឺនរៀល។

នេះគឺយើងនឹងធ្វើការពិន័យតាមច្បាប់ការងារ» ដែលលោកថាប្រាក់ពិន័យមានរវាងពី ៦០០ ដុល្លារទៅ ៩០០ ដុល្លារ។

យ៉ាងណាក្ដីកាលពីថ្ងៃទី ២៧ ខែកុម្ភៈ កែម សារិន ប្រធាននាយកដ្ឋានជនបរទេសអន្តោប្រវេសន៍បានថ្លែងថា ម្ចាស់ ឬនាយកសហគ្រាសមួយចំនួននៅតែព្យាយាមគេចវេះក្នុងការអនុវត្តច្បាប់ដែលនៅតែទទួល និងលួចលាក់ពលករបរទេសឲ្យដោយខុសច្បាប់ និងមិនរាយការណ៍ពីចំនួនជាក់ស្តែង និងលួចលាក់ប្រើប្រាស់ពលករបទេសខុសច្បាប់ និងជួនកាលស្វះស្វែងរកខ្នងបង្អែក ដើម្បីការពារខ្លួនទៀត។

លោកបានឲ្យដឹងថាចំនួនពលករបរទេសគឺមាន ១៦ ម៉ឺននាក់ ក្នុងនោះមានជនជាតិចិនជាង ១០ ម៉ឺននាក់ តែអ្នកធ្វើប័ណ្ណការងារជាង ៣ ម៉ឺននាក់ ខណៈពលករបទេសដែលទៅធ្វើប័ណ្ណការងារមាន ៥៧០០០ នាក់ដោយនៅសល់ជាង ១០ ម៉ឺននាក់ដែលពុំទាន់មានប័ណ្ណការងារ និងធ្វើឲ្យមានការបាត់បង់ថវិកាប្រមាណជាង ២៣ លានដុល្លារ។

រដ្ឋមន្ដ្រីក្រសួងមហាផ្ទៃលោក ស ខេង កាលពីថ្ងៃទី ២៧ ខែកុម្ភៈក៏ធ្លាប់បានអំពាវនាវដល់និយោជក និងថៅកែរោងចក្រផងដែរដោយកុំឲ្យពួកគេទទួលយកបុគ្គលិកបរទេសដែលគ្មានប័ណ្ណការងារឲ្យចូលបម្រើការងារ។ ជាមួយគ្នានេះលោកក៏បានព្រមានផងដែរថា ប្រសិនបើរកឃើញថា មានបុគ្គលបរទេសនោះ និយោជកនឹងត្រូវទទួលខុសត្រូវចំពោះមុខច្បាប់។

តាមរបាយការណ៍របស់អគ្គនាយកដ្ឋានអន្ដោប្រវេសន៍បានបង្ហាញថា បានចុះត្រួតពិនិត្យសហគ្រាស គ្រឹះស្ថាននានាចំនួន ៣៩៦៩ គោលដៅ មានពលករបរទេសសរុប ៣២ ៥១២ នាក់មាន ៩៣ សញ្ជាតិ ដែលក្នុងនោះបានផាកពិន័យជនបរទេសប្រកបមុខរបរ និងបម្រើការងារគ្មានប័ណ្ណការងារចំនួន ១៣៨៩ នាក់។

កាលពីដើមសប្ដាហ៍នេះស្នងការរងនគរបាលខេត្តព្រះសីហនុលោក ហ៊ុន សុរិទ្ធី ក៏បានត្អូញត្អែរដែរថា ជនអន្តោប្រវេសន៍ចិនមានចំនួនច្រើនលើសលប់នៅខេត្តលោក និងថា ពួកគេមិនបានសហការ និងប្រើឈ្មោះមន្ត្រីធំដែលពួកគេស្គាល់ ខណៈមន្ត្រីចុះបំពេញការងារមានឋានៈតូចតាច។

លោកបានបញ្ជាក់ថា៖ «នៅពេលយើងទៅស្រាវជ្រាវ យើងមិនអាចគ្រប់គ្រងថា តើមានពលករបរទេសចំនួនប៉ុន្មានកំពុងស្នាក់នៅទីនេះ ដោយសារតែម្ចាស់ក្រុមហ៊ុនមួយចំនួនមិនមែនជាមនុស្សតូចតាច។ ពួកគេមិនសហការ ហើយពួកគេនិយាយថា ពួកគេស្គាល់ឧត្តមសេនីយ៍ផ្កាយ ២ ផ្កាយ ៣ ខណៈយើងគ្រាន់តែផ្កាយ ១»។

លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងកាលពីថ្ងៃម្សិលមិញថា៖ «មិនត្រឹមតែជនជាតិចិននោះទេ ឃើញមានជនជាតិវៀតណាមដែលមកធ្វើការងារនៅស្រុកខ្មែរផងដែរ ហើយសង្ស័យថា និយោជករបស់ពួកគេមិនបានបំពេញតាមកាតព្វកិច្ចបង់ពន្ធ ជាពិសេសពួកគេធ្វើការនៅរោងចក្រអារឈើ និងមករយៈពេលខ្លី ដូចជា ៣ ខែទៅ ៦ ខែជាដើម។ វាមានរូបភាពច្រើនទៀត»។

លោកថ្លែងថា អាជ្ញាធរត្រូវគ្រប់គ្រង និងមានឥទ្ធិពលទៅលើសហគ្រាស និងក្រុមហ៊ុនឲ្យបានហ្មត់ចត់ទោះបីជាពួកគេមានឋានៈ និងបុណ្យស័ក្តិមានផ្កាយ ឬលោកខែក៏ដោយត្រូវតែ...មានវិធានការផ្លូវច្បាប់ត្រូវធ្វើដោយស្មើភាពមិនត្រូវបិទបាំងចំពោះនិយោជក ហើយបើនិយោជកបិទបាំងត្រូវប្រឈមមុខផ្លូវច្បាប់ដោយស្នើឲ្យកម្ពុជាអនុវត្តតាមគោលការណ៍អន្តោប្រវេសន៍ដូចនៅប្រទេសថៃដែលទៅធ្វើការនៅទីនោះហើយបានជួយគ្រប់គ្រងបានល្អដល់វិស័យសន្តិសុខលើជនបរទេស ហើយរកប្រាក់ចំណូលច្រើនជូនជាតិផងដែរ៕

ត្រួតពិនិត្យអត្ថបទដោយ postkhmer.com

Wednesday, February 28, 2018

អង្គការសហប្រជាជាតិ ចេញឯកសារសម្តែងក្តីបារម្ភពី ស្ថានភាពនយោបាយកម្ពុជា

Admin Wednesday, February 28, 2018

លោកស្រី Rhona Smith អ្នករាយការណ៍ពិសេស អសប។

ភ្នំពេញៈ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សកាលពីថ្ងៃចន្ទបានចេញឯកសារមួយចំនួនអំពីការប្រាស្រ័យទាក់ទងជាមួយរដ្ឋាភិបាលកម្ពុជាចាប់តាំងពីខែមិថុនាឆ្នាំមុនដោយបង្ហាញថាការិយាល័យបានលើកឡើងនូវក្តីបារម្ភរបស់ខ្លួនអំពីបញ្ហាជាច្រើនដែលមានតាំងពីការចាប់ខ្លួនលោក កឹម សុខា អតីតប្រធានគណបក្សសង្គ្រោះជាតិ និងការបណ្តេញប្រជាពលរដ្ឋចេញពីទំនប់វារីអគ្គិសនីសេសានក្រោម២។

លោកស្រីបានសរសេរថាកាលពីថ្ងៃទី ៨ ខែកញ្ញាអ្នករាយការណ៍ពិសេសរបស់អង្គការសហប្រជាជាតិលោកស្រី Rhona Smith បានលើកឡើងនូវមន្ទិលសង្ស័យអំពីភាពស្របច្បាប់នៃការចាប់ខ្លួនលោក កឹម សុខា ៥ ថ្ងៃជាមុន ដែល «ទំនងជាផ្ទុយនឹងសិទ្ធិទទួលបានសេរីភាព និងសន្តិសុខ និងសិទ្ធិទទួលបានការជំនុំជម្រះដោយយុត្តិធម៌»។

គ្រាន់តែ ២ ថ្ងៃមុននោះលោកស្រី Smith និងលោក David Kaye អ្នករាយការណ៍ពិសេសស្តីពីសេរីភាពនៃការបញ្ចេញមតិបានសុំឲ្យមានការពន្យល់ចំពោះបញ្ហាបំណុលពន្ធដែលដាក់ទៅលើកាសែតឌឹខេមបូឌាដេលី និងមូលដ្ឋានច្បាប់ចំពោះការដកអាជ្ញាប័ណ្ណផ្សព្វផ្សាយនៃស្ថានីយវិទ្យុជាច្រើន។

កាសែតឌឹខេមបូឌាដេលី បានបិទនៅពេលកាសែតនេះមានបញ្ហាបំណុលពន្ធចំនួន ៦,៣ លានដុល្លារកាលពីខែសីហាឆ្នាំមុន។

ជាងមួយខែកន្លះក្រោយមកនៅថ្ងៃទី ៣០ ខែតុលា បេសកកម្មអចិន្រៃ្តយ៍របស់កម្ពុជាប្រចាំអង្គការសហប្រជាជាតិបានឆ្លើយតបដោយអះអាងថា អ្នកគ្រប់គ្រងរបស់កាសែតនេះមិនសហការជាមួយនីតិវិធីរបស់អគ្គនាយកដ្ឋានពន្ធដារ។

បេសកកម្មអចិន្រៃ្តយ៍របស់កម្ពុជាប្រចាំអង្គការសហប្រជាជាតិបានសរសេរថា៖ «[អគ្គនាយកដ្ឋានពន្ធដារ] បានទូរស័ព្ទជាច្រើនដងទៅការិយាល័យ [កាសែតឌឹខេមបូឌាដេលី] និងបានផ្ញើលិខិតអញ្ជើញមួយចំនួនដោយអញ្ជើញពួកគេឲ្យមកការិយាល័យអគ្គនាយកដ្ឋានពន្ធដារដើម្បីធ្វើការពិភាក្សាអំពីបញ្ហាមិនអនុលោមភាពពន្ធដារដើម្បីដោះស្រាយកាតព្វកិច្ចពន្ធដាររបស់ពួកគេ ហើយលិខិតទាំងអស់នោះមិនត្រូវបានអើពើដោយកាសែតឌឹខេមបូឌាដេលីដោយចេតនា»។

អ្នករាយការណ៍ពិសេសជាច្រើនរបស់អង្គការសហប្រជាជាតិកាលពីថ្ងៃទី ១ ខែមិថុនាបានសម្ដែង «ក្តីបារម្ភធ្ងន់ធ្ងរ» ចំពោះការដាក់ពន្ធនាគារ «មន្ត្រីអាដហុក ៥ នាក់» ព្រមទាំងការឃុំខ្លួនសកម្មជនសិទ្ធិដីធ្លីអ្នកស្រី ទេព វន្នី។

នៅខែជាមួយគ្នានោះ «មន្ត្រីអាដហុក ៥ នាក់» ដែល ៤ នាក់ជាមន្ត្រីអង្គការសិទ្ធិមនុស្សអាដហុក និងម្នាក់ទៀតជាមន្ត្រីគណៈកម្មាធិការជាតិរៀបចំការបោះឆ្នោតត្រូវបានដោះលែងឲ្យនៅក្រៅឃុំ។

សកម្មជនអង្គការមាតាធម្មជាតិលោក ឌឿម គុនឌី និង លោក ហ៊ុន វណ្ណៈ ដែលត្រូវបានចាប់ខ្លួនដោយសារការថតរូបនាវាដឹកខ្សាច់នៅខេត្តកោះកុងក៏ជាបញ្ហាមួយនៃក្តីបារម្ភផងដែរ ហើយបានលេចឡើងនៅក្នុងលិខិតប្រាស្រ័យទាក់ទងថ្ងៃទី ៦ ខែតុលា។

ចាប់តាំងពីពេលនោះពួកគេត្រូវបានកាត់ទោសព្យួរទោសមួយផ្នែក និងត្រូវបានដោះលែងកាលពីដើមខែនេះ។

ទន្ទឹមនេះលិខិតប្រាស្រ័យទាក់ទងខែកក្កដាបានបង្ហាញ «ក្តីបារម្ភធ្ងន់ធ្ងរអំពីរបៀបដែលគម្រោង [ទំនប់វារីអគ្គិសនីសេសានក្រោម២] ដំណើរការយ៉ាងម៉េច»។

ប្រជាពលរដ្ឋរាប់រយគ្រួសារត្រូវបង្ខំចិត្តបោះបង់ផ្ទះរបស់ខ្លួនដើម្បីបើកផ្លូវគម្រោងវារីអគ្គិសនីនេះ។

នៅក្នុងការឆ្លើយតបរបស់ខ្លួនកាលពីខែកញ្ញាបេសកកម្មនេះបានធ្វើទឡ្ហីករណ៍ថា ទំនប់នេះបម្រើ «ប្រជាជនខ្មែរ» ទាំងអស់រួមទាំងក្រុមជនជាតិភាគតិចដែលទទួលរងការប៉ះពាល់។

ក្រុមបេសកកម្មបានសរសេរថា៖ «[យើង] មានឈាមខ្មែរមិនមានជាតិសាសន៍ដទៃណាស្រឡាញ់ខ្មែរជាងខ្មែរខ្លួនយើងនោះទេ»។ [ដូច្នេះ] គម្រោងវារីអគ្គិសនីទាំងអស់គឺមានការពិចារណាពេញលេញ និងច្បាស់លាស់»។

លោក Phil Robertson អនុប្រធានអង្គការឃ្លាំមើលសិទ្ធិមនុស្សប្រចាំអាស៊ីបានថ្លែងថា លិខិតប្រាស្រ័យទាក់ទងទាំងនេះគឺ «សំខាន់ណាស់» ចំពោះកំណត់ត្រាប្រវត្តិសាស្ត្រ។

លោកបានថ្លែងថា៖ «[ឯកសារទាំងនេះគឺជាការបង្ហាញដោយសុក្រឹតអំពីក្តីបារម្ភពីអ្នកជំនាញជាន់ខ្ពស់របស់អង្គការសហប្រជាជាតិអំពីការរំលោភបំពានសិទិ្ធមនុស្សហើយឯកសារទាំងអស់នេះគឺជាមូលដ្ឋានដើម្បីឲ្យមានចំណាត់ការបន្ថែមដោយក្រុមប្រឹក្សាសិទ្ធិមនុស្សរបស់អង្គការសហប្រជាជាតិ»។

លោកបានបន្តថា៖ «[វា] ក៏ជំរុញឲ្យមានទំនុកចិត្តផងដែរចំពោះក្រុមអ្នកការពារសិទ្ធិមនុស្ស និងអង្គការដែលត្រូវបានធ្វើទុក្ខបុកម្នេញដោយអនុញ្ញាតឲ្យពួកគេដឹងថា ពួកគេមិនមែននៅម្នាក់ឯងទេ ដោយសារមនុស្សមានឥទ្ធិពលកំពុងការពារសិទ្ធិរបស់ពួកគេ និងដើរតួជួយពួកគេ»។

ប៉ុន្តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានថ្លែងថា ដៃរបស់កម្ពុជាត្រូវបានចងដោយនីតិរដ្ឋរបស់ខ្លួន។ លោកបន្តថា៖ «យើងយល់ថា ពួកគេលើកអំពីក្តីបារម្ភរបស់ពួកគេ ប៉ុន្តែយើងត្រូវតែគោរពច្បាប់»។ «ស្ថិរភាពគឺជា [កត្តា] សំខាន់បំផុត។ តើយើងអាចផ្លាស់ប្តូរច្បាប់យ៉ាងម៉េចទៅ?»៕ អត្ថបទ និង រូបភាព postkhmer.com

ស៊ី ជីនភីង រៀបចំដំណើរការដឹកនាំប្រទេសចិន មួយជីវិតលោក

Admin Wednesday, February 28, 2018

លោក ស៊ី ជីនភីង ប្រធានាធិបតីចិនដែលនឹងត្រូវអនុញ្ញាតឲ្យកាន់អំណាចកំពូលនេះមួយជីវិតលោក។ AFP

ក្រុងប៉េកាំងៈ ដំណើរការ ឈានទៅកាន់អំណាចមួយជីវិតរបស់លោកប្រធានាធិបតីស៊ីជីនភីង ត្រូវបានបំពេញដោយភាពស្ងប់ស្ងាត់មានការការពារនៅក្នុងពិភពមូលធននិយម ខណៈរដ្ឋាភិបាលកំពុងព្យាយាមប៉ាន់ប្រមាណថា តើមេដឹកនាំឆ្នើមរបស់ចិននឹងប្រើប្រាស់អំណាចទើបតែបង្កើតថ្មីនៅលើឆាកអន្តរជាតិតាមរបៀបណានោះ។

វិធានការលុបចោលការកំណត់អាណត្តិប្រធានាធិបតី របស់គណបក្សកុម្មុយនីស្តចិននឹងអនុញ្ញាតឲ្យលោកស៊ី កាន់អំណាចកំពូល ខណៈលោកជំរុញតាមរយៈរបៀបវារៈប្រកបដោយមហិច្ឆតា ដើម្បីប្រែក្លាយប្រទេសចិនឲ្យទៅជាប្រទេសមហាអំណាចយោធានិងសេដ្ឋកិច្ច ត្រឹមពាក់កណ្តាលសតវត្សរ៍នេះ។

លោក Kerry Brown នាយកនៃវិទ្យាស្ថាន Lau China នៃមហាវិទ្យាល័យ King នៅក្រុងឡុងដ៍ បានថ្លែងថា៖ «លោកស៊ី មានអំណាចគ្រប់យ៉ាង។ ប៉ុន្តែយើងមិនដឹងថាលោកចង់ប្រើប្រាស់អំណាចទាំងនោះដើម្បីអ្វីនោះទេ»។

ប្រសិនបើចាំបាច់ត្រូវដោះស្រាយឧបសគ្គជាច្រើន ដែលត្រូវការស្វែងរកដំណោះស្រាយនៅចិននោះ គឺជារឿងល្អ។ប្រសិនបើមិនដូច្នេះទេវានឹងក្លាយជាបញ្ហាធ្ងន់ធ្ងរទៅវិញ។

ចិនកំពុងធ្វើឲ្យមានភាពជ្រួលច្របល់នៅទូទាំងពិភពលោក ជាមួយនឹងការអះអាងកើនឡើងពីការទាមទារទឹកដីរបស់ខ្លួននៅក្នុងសមុទ្រចិនខាងត្បូង រហូតដល់ការបើកមូលដ្ឋានយោធាបរទេសជាលើកដំបូងរបស់ខ្លួននៅអាហ្រ្វិក និងឥទ្ធិពលរបស់ខ្លួននៅបណ្តាប្រទេសមូលធននៅលោកខាងលិចនោះ។

លោកស៊ី បានគាំទ្រគម្រោងមួយនៃគម្រោងរចនាសម្ព័ន្ធអន្តរជាតិធំបំផុតជាប្រវត្តិសាស្ត្រគឺគម្រោងផ្លូវមួយ និងខ្សែក្រវាត់មួយមានតម្លៃជាទឹកប្រាក់ពាន់ពាន់លានដុល្លារដែលនាំឲ្យមានការចាប់អារម្មណ៍ និងសង្ស័យលើគោលបំណងរបស់ចិន។

ចានដែលតុបតែងលម្អដោយរូបថតរបស់ប្រធានាធិបតីចិន លោកស៊ី ជីនភីង ត្រូវបានមើលឃើញនៅពីក្រោយរូបសំណាករបស់លោកម៉ៅ សេទុង។ AFP

នៅពេលជាមួយគ្នានោះ ចិន កំពុងស្ថិតនៅលើមាត់ជ្រោះនៃសង្គ្រាមពាណិជ្ជកម្មជាមួយនឹងមហាអំណាចសេដ្ឋកិច្ចធំបំផុតនៃពិភពលោក គឺអាមេរិក។

នៅក្នុងប្រទេសវិញ វិធានការនេះត្រូវបានស្វាគមន៍ដោយប្រព័ន្ធផ្សព្វផ្សាយរដ្ឋថាជាវិធានការចាំបាច់មួយ ដើម្បីធ្វើឲ្យយុគសម័យមួយមានស្ថិរភាពដែលនឹងផ្តល់ក្តីសង្ឃឹមច្រើនដល់បណ្តាប្រទេសដែលរង ការភិតភ័យដោយនយោបាយរបស់អាមេរិកនោះ។

លោក Wu Xinbo ជាអ្នកជំនាញនយោបាយអាមេរិកនៅសាកលវិទ្យាល័យ Fudan បានថ្លែងប្រាប់ AFP ថា៖ «នៅពេលអនាគត ដោយមានលោកស៊ី ដឹកនាំប្រទេសមួយជីវិត វាត្រូវបានធានាថា ចំណងទំនាក់ទំនងជាមួយបរទេស នឹងមានស្ថិរភាព និងអាចព្យាករទុកបាន»។

ការធ្វើវិសោធនកម្មរដ្ឋធម្មនុញ្ញរបស់បក្សកុម្មុយនិស្តចិនប្រាកដណាស់ថានឹងត្រូវបានអនុម័ត ដោយសភាប្រថាប់ត្រារបស់ប្រជាជនចិន នៅពេលសភាចាប់ផ្តើមជំនួបប្រចាំឆ្នាំនៅសប្តាហ៍ក្រោយ ដែលនឹងធ្វើឲ្យលោកស៊ីនៅបន្តតំណែងប្រធានាធិបតីលើសពីឆ្នាំ ២០២៣ តទៅទៀត៕ អត្ថបទ និង រូបភាព postkhmer.com

HEMCHEATIMEDAY

Advertise here

Thursday, March 1, 2018

រដ្ឋាភិបាលសម្រេចផ្អាកការដឹកឈើចេញពីតំបន់សង់ទំនប់សេសាន ២

សម្ភាសន៍ ម្ចាស់វណ្ណកម្មកំណាព្យបែបប្រវត្តិសាស្ត្រ «ទំនួញក្រាំងមាសសាវតារខ្មែរ»

ជនបរទេសធ្វើការនៅកម្ពុជារងការព្រមានចាត់វិធានការបើមិនអនុវត្តកាតព្វកិច្ច

Wednesday, February 28, 2018

អង្គការសហប្រជាជាតិ ចេញឯកសារសម្តែងក្តីបារម្ភពី ស្ថានភាពនយោបាយកម្ពុជា

ស៊ី ជីនភីង រៀបចំដំណើរការដឹកនាំប្រទេសចិន មួយជីវិតលោក

ប្រធានបទ

គេហៈទំព័រព័ត៌មាន

About us

FAQ's

បណ្តាញសង្គម

វិទ្យុអន្តរជាតិ

HEMCHEATIMEDAY

Advertise here

Thursday, March 1, 2018

រដ្ឋាភិបាល​សម្រេច​ផ្អាក​ការដឹកឈើ​ចេញ​ពី​តំបន់​សង់​ទំនប់​សេសាន​ ២

សម្ភាសន៍ ម្ចាស់​វណ្ណ​កម្ម​កំណាព្យ​បែប​ប្រវត្តិសាស្ត្រ «​ទំនួញ​ក្រាំងមាស​សាវតារ​ខ្មែរ​»

ជនបរទេស​ធ្វើការ​នៅ​កម្ពុជា​រង​ការ​ព្រមាន​ចាត់​វិធានការ​បើ​មិន​អនុវត្ត​កាតព្វកិច្ច

Wednesday, February 28, 2018

អង្គការ​សហប្រជាជាតិ​​ ចេញ​ឯកសារ​សម្តែង​ក្តីបារម្ភ​ពី ​ស្ថានភាព​នយោបាយ​កម្ពុជា

ស៊ី ជីន​ភីង ​រៀបចំ​ដំណើរ​ការដឹក​នាំ​ប្រទេស​ចិន មួយ​ជីវិត​លោក

ប្រធានបទ

គេហៈទំព័រព័ត៌មាន

About us

FAQ's

បណ្តាញសង្គម

វិទ្យុអន្តរជាតិ

រដ្ឋាភិបាលសម្រេចផ្អាកការដឹកឈើចេញពីតំបន់សង់ទំនប់សេសាន ២

សម្ភាសន៍ ម្ចាស់វណ្ណកម្មកំណាព្យបែបប្រវត្តិសាស្ត្រ «ទំនួញក្រាំងមាសសាវតារខ្មែរ»

ជនបរទេសធ្វើការនៅកម្ពុជារងការព្រមានចាត់វិធានការបើមិនអនុវត្តកាតព្វកិច្ច

អង្គការសហប្រជាជាតិ ចេញឯកសារសម្តែងក្តីបារម្ភពី ស្ថានភាពនយោបាយកម្ពុជា

ស៊ី ជីនភីង រៀបចំដំណើរការដឹកនាំប្រទេសចិន មួយជីវិតលោក